آلما گولو

سروده های ترکی  ؛  تورکو شئعرلر

پاییز اورتگل ortagöl payızı

پاییز اولدو شیرین دیللی قوناق‌لار
کؤچوب گئدیب بوشاتدؽلار بو کندی
گئجه‌لرین ییغیناغی داغیلیب
اورتاگؤلون خوش گون‌لری تیکندی

کَد بوش اولسا یئل‌ده یامان کوفوللار
کؤپک هۆرور، پیشیک‌لرده ماووللار
قاپی‌لاردا گؤردوم بؤیوک قوفول‌لار
اۆره‌گیمه غم داغیننان یوک اندی

گؤینوم ایستر گئدم گزم باغلاری
ده‌ده مینن دولاندیکیم داغلاری
یادا سالام گئچیب گئدن چاقلاری
بو خیال لار آدام بئلی بوکندی

پاییز گۆنو دولانماغا هارا وار
سوسوز داغین اۆرگینده یارا وار
ایندی داغدا ایککی بختی قارا وار
بیری شاعیر ، بیری بوغدا اکندی