نییه دۇنیا؟

1 دونیا منی سن آهؽتوتان ائیلمهدین؟
باغرؽمی قان ائدنین باغرینی قان ائیلمهدین!

بو نه انصافدؽ منیم یازگونو سۆمسالدؽ گۆلوم
سئیرقیبلر گۆلونو قیشده خزان ائیلمهدین

اۏلدو چوخ ظالؽم الیندن اۆرهگیم قان چاناغؽ
نه دینین وار کی فلک هئچ قانا قان ائیلمهدین

یاخشؽ اۏلدوقجا یامان میللتی اکدین یۏلوما
اۏ یامان میللته هئچ یئرده یامان ائیلمهدین

هانسؽ مئیداندا منیم قوللارؽمؽ باغلامادؽن
هانسؽ بازاردا منی اهلِ زیان ائیلمهدین

هانسؽ خوش گونلری قویدون قاداسؽز آخشام اولا
هانسؽ سرخوش گئجهنی غۇصصالؽ دان ائیلمهدین

هانسی آشکار یولومون اولمادؽ گیزلین قۇیوسو
هانسؽ گیزلین سؤزومو خالخا عیان ائیلمهدین

هاردا بختیم اۏخونو قۏیدون اۏتورسون هدفه
هاردا یۏرغون جانؽمؽ درده نشان ائیلمهدین

من چاغاردان چورڲی هاردا قانا دوغرامادؽن
من سئون آرزؽلارؽ هاردا یالان ائیلمهدین

دئ هاچان ایستهدیکیم خئیری یئتیردین الیمه
یۏخسا من ایستهمیین شرری هاچان ائیلمهدین

«رحیم» اوز ائیلهدیکین تقصیریده بۏینوېا آل
سنده چوخ سؤزلری وقتینده بیان ائیلمهدین